Sərt disklərdə mexaniki hissələr — başlıqlar, maqnit lövhələri və mühərrik var. Flash yaddaşlarda və SSD-lərdə isə bunların heç biri yoxdur. Buna görə də bir çox insan onları daha etibarlı hesab edir.
Amma bu, tam olaraq belə deyil. Onların da öz problemləri var
Fləş yaddaş aşınır
Hər yaddaş hüceyrəsinin məhdud sayda yazma və silmə dövrü var. Bu limitə çatdıqda məlumat itkisi baş verə bilər.
Təəssüf ki, bəzi hallarda bu proses istehsalçının göstərdiyi nəzəri göstəricilərə çatmadan da baş verə bilər. Başqa sözlə, yaddaşın keyfiyyəti və etibarlılığı zaman keçdikcə azala bilər.
Controller — Fləş və SSD-nin “beyni”
Controller məlumatların yaddaş hüceyrələri arasında bölüşdürülməsini idarə edir, səhvlərin düzəldilməsi (ECC), yaddaşın aşınmasının idarə olunması və digər vacib proseslərə nəzarət edir.
Controller sıradan çıxarsa, yaddaş daşıyıcısı sistem tərəfindən ümumiyyətlə tanınmaya bilər və məlumatlara giriş itirilə bilər.
TRIM
TRIM müasir əməliyyat sistemlərində SSD-lər üçün adətən aktiv olan funksiyadır.
Fayl silindikdə və ya bəzi hallarda formatlama əməliyyatı aparıldıqda TRIM SSD-yə həmin məlumat sahələrinin artıq istifadə olunmadığını bildirir.
SSD-nin daxili Garbage Collection mexanizmi ilə birlikdə bu proses sonradan həmin məlumatların NAND yaddaşından təmizlənməsinə səbəb ola bilər.
HDD-də fayl silindikdə məlumatın fiziki sahələri müəyyən müddət ərzində qala bilər və üzərinə yeni məlumat yazılmayana qədər bərpa etmək mümkün ola bilər.
SSD-də isə TRIM və sonrakı Garbage Collection məlumatın fiziki olaraq təmizlənməsinə səbəb ola bilər. Bu baş verdikdən sonra proqram təminatı ilə məlumatların bərpası mümkün olmaya bilər.
Monolit Fləş yaddaşlar
Monolit Flash kartlar ayrıca mürəkkəb vəziyyətdir.
Bu tip yaddaşlarda controller və NAND yaddaş komponentləri vahid korpusun daxilində yerləşir. Məlumatların oxunması üçün xüsusi avadanlıq və həmin modelə uyğun pinout — kontaktların qoşulma sxemi tələb oluna bilər.
Bəzi hallarda düzgün pinout məlum olmadıqda və ya yaddaş çipi ciddi zədələndikdə məlumatların oxunması çox çətin, hətta mümkün olmaya bilər.
NƏTİCƏ
Fləş yaddaşlar və SSD-lər HDD-dən mütləq daha etibarlı deyil.
Sadəcə onlar fərqli şəkildə sıradan çıxırlar.
Və bəzi hallarda SSD və Fləş yaddaşlardan məlumatların bərpası HDD ilə müqayisədə daha mürəkkəb və daha az mümkün ola bilər.
Vacib məlumatınız SSD və ya Fləş yaddaşdadırsa və cihazda problem yaranıbsa, istifadəni dayandırın və peşəkar diaqnostikaya müraciət edin.
DataRecovery.az — Məlumatların bərpası üzrə servis mərkəzi
