Microsoft Research fizika üzrə mütəxəssisləri 10 000 ildən çox müddət ərzində məlumat saxlaya bilən yeni optik yaddaş texnologiyası hazırlayıblar.
4,8 TB məlumat cəmi 120 mm² sahəyə yerləşdirildi
Yeni texnologiya SSD və HDD-lərə alternativ kimi təqdim olunur. Şirkətin məlumatına görə, cəmi 120 mm² sahəsi və 2 mm qalınlığı olan şüşə lövhəyə 4,8 terabayt məlumat yerləşdirmək mümkün olub.
Texnologiya necə işləyir?
Metodun əsasında femtosaniyəlik (çox qısa) lazer impulsları dayanır. Bu lazer şüşənin (borosilikat şüşə) daxilində materialın işıq sındırma xüsusiyyətlərini nöqtəvi şəkildə dəyişir.
Nəticədə şüşənin içində voksel adlanan üçölçülü “piksel”lər formalaşır. Hər bir voksel eyni anda bir neçə bit məlumat saxlaya bilir.
Bir lazer şüası ilə yazma sürəti 25,6 Mbit/s təşkil edir ki, bu da böyük həcmli məlumatların sürətli arxivləşdirilməsinə imkan verir.
Davamlılıq və təhlükəsizlik
Microsoft-un şüşə yaddaş daşıyıcıları xarici təsirlərə qarşı demək olar ki, həssas deyil.
Sınaqlar zamanı daşıyıcı 500°C temperaturda uzunmüddətli qızdırılmaya məruz qalsa belə, məlumatlar uğurla oxunub.
Oxuma və yazma prosesinin dəqiqliyini təmin etmək üçün sistem süni intellekt alqoritmlərindən istifadə edir. Proseslər tam avtomatlaşdırılıb və bu texnologiyanın data mərkəzlərində geniş istifadəsini mümkün edir.
