Western Digital və SanDisk-in bölünməsi Windows 11 istifadəçilərinə problem yaratdı — WD Black SN770 SSD sahibləri yeniləmə ala bilmirlər
Microsoft hazırda populyar Western Digital (SanDisk) SSD-ləri ilə təchiz edilmiş sistemlərdə Windows 11-in 24H2 versiyasının yenilənməsini bloklayır. Ən maraqlısı isə odur ki, bu məsələni həll edən yeni mikroproqram (firmware) bir neçə aydır ki, mövcuddur, amma Microsoft istifadəçilərə nə bu barədə xəbərdarlıq edir, nə də düzgün yükləmə təlimatı verir.
Söhbət bazarda geniş yayılmış WD Black SN770 SSD-dən gedir. Belə bir SSD-yə sahib olan istifadəçilər Windows 11 24H2 yeniləməsini quraşdırmaq istəyərkən bu cür xəbərdarlıq alırlar:
"Sizin cihazınız bu Windows versiyası üçün uyğun olmayan avadanlıqla təchiz edilib. Problemi həll etmədən yeniləmə mümkün deyil."
Ən pis tərəfi odur ki, sistem bu problemin necə həll ediləcəyi barədə heç bir əlavə məlumat vermir. Üstəlik, bu problem Microsoft-un rəsmi dəstək sənədlərində belə qeyd olunmayıb.
Problemin kökü nədir?
Problem SSD-nin texniki quruluşu ilə bağlıdır:
WD Black SN770 modelində ayrı DRAM keş yoxdur. Buna görə də sistem keş üçün birbaşa kompüterin operativ yaddaşından istifadə edir. Bu quruluş bəzi uyğunsuzluqlara səbəb olur və Windows 11 24H2 ilə konflikt yaradır.
Western Digital bu problemi 2023-cü ilin oktyabrında hazırladığı mikroproqram yeniləməsi ilə həll edib. Amma Microsoft-un yeniləmə sistemi yanlış link təqdim etdiyi üçün istifadəçilər bu firmware-i tapa bilmirlər.
Necə həll etmək olar?
Reddit istifadəçilərindən biri bu problemin öhdəsindən gəlib və aşağıdakı addımları ataraq sistemi yeniləyə bilib:
- SanDisk Dashboard adlı xüsusi proqramı yükləyib
- Onun vasitəsilə SSD üçün düzgün firmware quraşdırıb
- Daha sonra Windows 11 24H2 yeniləməsi problemsiz şəkildə quraşdırılıb
Bu qarışıqlığın səbəbi də Western Digital və SanDisk-in ayrılmasıdır. İndi NAND yaddaşlı SSD-lərə SanDisk cavabdehdir və bütün firmware yeniləmələri SanDisk Dashboard üzərindən aparılır.
