Seagate 100 TB-lıq sərt disklərin çıxış tarixini açıqladı
İstifadəçi cihazlarının bərk vəziyyətli yaddaş qurğularına (SSD) keçidi qaçılmaz görünsə də, klassik sərt disklərə (HDD) olan tələbat süni intellekt sistemlərinin artması ilə birlikdə yüksəlməkdə davam edir. Seagate bu tendensiyaya uyğun olaraq, 2030-cu ilə qədər 100 TB tutumlu sərt disklər istehsal etməyi planlaşdırır.
Bu ilin yanvar ayında Seagate Technology Exos M ailəsinə daxil olan 36 TB tutumlu sərt diskləri bazara çıxardı. Şirkətin kommersiya direktoru Ban-Seng Teh CNBC-yə verdiyi müsahibədə bildirib ki, onilliyin sonuna qədər bu tutumun təxminən üçqat artırılması planlaşdırılır. Onun sözlərinə görə, Seagate müştərilərinin çoxu bu səviyyədə yüksək tutumlu yaddaş qurğularına ehtiyac duyur.
O bildirib: “Bazarın artan ehtiyaclarını qarşılaya biləcək başqa heç bir yaddaş texnologiyası yoxdur.”
Məlumat mərkəzlərinin genişlənməsi və enerji məsələsi
Süni intellekt sistemlərinin inkişafı və bu sahədə yaranan tələblər məlumat mərkəzlərinin sürətlə artmasına səbəb olur. Bu isə öz növbəsində onların enerji sərfiyyatını artırır. Seagate bu artımı yaddaş sıxlığını artırmaqla kompensasiya etməyə çalışır.
Şirkət, yüksək tutumlu HDD-lər təqdim etməklə məlumat mərkəzlərinin daha az enerji və məkan sərf etməsini, eyni zamanda daha çox məlumat saxlaya bilməsini təmin edir.
Seagate eyni zamanda öz sərt disklərinin istehsal prosesində bərpa olunan enerji mənbələrindən istifadəyə üstünlük verir və bütün istehsalat müəssisələrini bu enerjiyə keçirməyi qarşısına məqsəd qoyub.
Ətraf mühitə təsir və SSD-lərlə müqayisə
Seagate-in nümayəndəsinin sözlərinə görə, SSD-lər bir çox üstünlüklərə malik olsa da, istehsal və istismar mərhələlərində ətraf mühitə klassik sərt disklərə nisbətən daha çox zərər vurur. Buna görə də, məlumat mərkəzlərində hələ də HDD-lər daha ekoloji cəhətdən üstün seçim hesab olunur.
